× ທນບ ສາຂາອຸດົມໄຊ ສຳເລັດການລົງດຳເນີນຊີວິດການເມືອງ 6 ເດືອນທ້າຍປີ 2017 ຂັ້ນໜ່ວຍບໍລິການ
image

ພາບ-ຂ່າວໂດຍ: ແສງສະໝີ ບຸດດາສັກ
      ທະນາຄານ ນະໂຍບາຍ ສາຂາ ອຸດົມໄຊ ສໍາເລັດການລົງເຄື່ອນໄຫວດໍາເນີນຊີວິດການເມືອງ 6 ເດືອນທ້າຍປີ 2017 ໃນ 6 ໜ່ວຍບໍລິການ ເຊິ່ງເລີ່ມແຕ່ ວັນທີ່ 29 ມັງກອນ 2018 ຫາ ວັນທີ່ 06 ກຸມພາ 2018 ນໍາພາຄະນະທີມງານໂດຍ ທ່ານ ນ ຈັນເພັງ ໄຊລືຕາ ວ່າການຫົວໜ້າ ທະນາຄານ ນະໂຍບາຍ ສາຂາອຸດົມໄຊ ປະທານສະພາຄະນະຄຸ້ມຄອງພະນັກງານຂັ້ນສາຂາ ແລະ ຄະນະກໍາມະການຄຸ້ມຄອງພະນັກງານຂັ້ນສາຂາເຂົ້າຮ່ວມ ເຊິ່ງການດໍາເນີນຊີວິດການເມືອງໃນຄັ້ງນີ້ມີຜູ້ເຂົ້າຮ່ວມທັງໝົດ 42 ທ່ານ, ຍິງ 16 ທ່ານ ໃນນີ້ມີສະມາຊິກພັກ 16 ສະຫາຍ, ຍິງ 4 ສະຫາຍ.
      ການດໍາເນີນຊີວິດການເມືອງໃນຄັ້ງນີ້ ທ່ານ ນ ຈັນເພັງ ໄຊລືຕາ ຮອງເລຂາໜ່ວຍພັກ ທນບ ສາຂາອຸດົມໄຊ ປະທານຄະນະກໍາມະການຄຸ້ມຄອງພະນັກງານ ທນບ ສາຂາອຸດົມໄຊ ໄດ້ນໍາເອົາເອກະສານຈໍານວນໜຶ່ງໄປເຜີຍແຜ່ເຊື່ອມຊືມໃຫ້ແກ່ສະມາຊິກພັກ-ພະນັກງານເຊັ່ນ: ເອກະສານນໍາພາແນວຄິດ ພະນັກງານ - ສະມາຊິກພັກ ເລກທີ່ 15/ຄອສພ, ເອກະສານມະຕິເລກທີ່ 022/ຄບສພ ວ່າດ້ວຍການແກ້ໄຂພະຍາດອາດຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງແຕ່ນີ້ຮອດປີ2020, ເອກະສານ 13 ຂໍ້ຫ້າມຂອງພະນັກງານ - ລັດຖະກອນ, ເອກະສານ 15 ຂໍ້ຫ້າມຂອງສະມາຊິກພັກ ເພື່ອເຮັດໃຫ້ພະນັກງານ - ສະມາຊິກພັກ ມີສະຕິລະວັງຕົວ ແລະ ສະກັດກັ້ນບັນຫາປະກົດການຫຍໍ້ທໍ້ບໍ່ໃຫ້ເກີດຂື້ນພາຍໃນສາຂາ. ຫຼັງຈາກນັ້ນໄດ້ຮັບຟັງການຜ່ານ ບົດສະຫຼຸບຕີລາຄາການຈັດຕັ້ງປະຕິບັດວຽກງານຂອງໜ່ວຍບໍລິການ ໃນ 6 ເດືອນທ້າຍປີ ແລະ ທິດທາງແຜນການປີ 2018 ແລະ ບົດສໍາຫຼວດຕົນເອງຂອງຄະນະໜ່ວຍ, ພະນັກງານພາຍໃນໜ່ວຍບໍລິການ. ຈາກນັ້ນກໍ່ໄດ້ມີການປະກອບຄໍາຄິດຄໍາເຫັນຕໍ່ບົດສະຫຼຸບຂອງໜ່ວຍ, ທິດທາງແຜນການ ແລະ ໃບສໍາຫຼວດຂອງພະນັກງານພາຍໃນໜ່ວຍ ໂດຍຍົກເອົາບັນຫາທີ່ຄົງຄ້າງເຮັດບໍ່ທັນໄດ້ ແລະ ມາດຕະການແກ້ໄຂຈຸດຄົງຄ້າງ ມາເວົ້າກັນ
      ໃນຕອນທ້າຍ ປະທານຄະນະກໍາມະການຄຸ້ມຄອງພະນັກງານຂັ້ນສາຂາກໍ່ໄດ້ໂອ້ລົມ ແລະ ໃຫ້ທິດຊີ້ນໍາດັ່ງນີ້:
      1.  ໃຫ້ຄະນະໜ່ວຍເພີ່ມທະວີການສຶກສາອົບຮົມທາງດ້ານການເມືອງແນວຄິດໃຫ້ແກ່ ພະນັກງານ-ສະມາຊິກພັກ ເປັນປົກກະຕິ ໂດຍຖືເອົາການລວມຊີວິດປະຈໍາເດືອນເປັນຫຼັກ, ຖືເອົາການຕໍານິກໍ່ສ້າງເຊິ່ງກັນ ແລະ ກັນເປັນສໍາຄັນ. ພ້ອມນັ້ນກໍ່ຕ້ອງນໍາເອົາເອກະສານສໍາຄັນຕ່າງໆທີ່ກ່ຽວຂ້ອງເປັນຕົ້ນແມ່ນ ມະຕິເລກທີ່ 022/ຄບສພ, 13ຂໍ້ຫ້າມ ແລະ 15 ຂໍ້ຫ້າມ ເຜີຍແຜ່ເຊືອມຊືມເທື່ອລະເອກະສານເພື່ອເຮັດໃຫ້ ສະມາຊິກພັກ - ພະນັກງານ ມີສະຕິລະວັງຕົວຕໍ່ຄວາມຮັບຜິດຊອບ.
      2.  ປັບປຸງແບບແຜນວິທີເຮັດວຽກ, ແບບແຜນການນໍາພາໃຫ້ມີຄວາມໜັກແໜ້ນ, ເຂັ້ມແຂງຂື້ນຕື່ມ, ຍົກສູງທາງດ້ານຄຸນນະພາບຂອງວຽກງານໃຫ້ສູງ.
      3.  ເພີ່ມທະວີການຄຸ້ມຄອງໜີ້ສິນໃຫ້ຢູ່ຕາມເກນທີ່ ທຫລ ກໍານົດ ໂດຍສະເພາະແມ່ນໜີ້ NPL ໃຫ້ຫຼຸດລົງຈາກ 33% (ໜີ້ 2015 ຄືນຫຼັງ) ສ່ວນໜີ້ປ່ອຍ 2016 ຂື້ນມາບໍ່ໃຫ້ເກີນ 3%
      4.  ເພີ່ມທະວີຂອດການປະສານງານກັບອົງການປົກຄອງທ້ອງຖີ່ນ, ຄະນະກໍາມະການຄຸ້ມຄອງສິນເຊື່ອແຕ່ລະຂັ້ນ, ຂະແໜງການທີ່ກ່ຽວຂ້ອງໃຫ້ປີ່ນອ້ອມ ແລະ ກົມກຽວ ເພື່ອເຮັດໃຫ້ການເຮັດວຽກໄປລວງດຽວກັນ.
      5.  ເພີມທະວີຄວາມສາມັກຄີພາຍໃນໃຫ້ມີຄວາມແໜ້ນແຟ໊ນ, ຕ້ານ ແລະ ສະກັດກັ້ນບັນຫາທາງການຈົ່ມວ່າ ແລະ ຄວາມບໍ່ສະຫງົບພາຍໃນໂດຍພື້ນຖານ.
      6.  ເອົາໃຈໃສ່ການຄຸ້ມຄອງພະນັກງານໃຫ້ເຂົ້າສູ່ລະບຽບ, ຮັດກຸມດ້ານລາຍຈ່າຍ, ຕ້ານ ແລະ ສະກັດກັ້ນດ້ານການຟູມເຟືື່ອຍ, ປະຢັດມັດທະຢັດ ຈ່າຍສິ່ງທີ່ຈໍາເປັນ ຫ້າມບໍ່ໃຫ້ເກີນແຜນ.
      7.  ເພີ່ມທະວີການປ້ອງກັນເວນຍາມ ຫ້ອງການ-ສໍານັກງານ ໃຫ້ມີຄວາມປອດໄພ ຕ້ານ ແລະ ສະກັດກັ້ນບັນຫາປະກົດການຫຍໍ້ທໍ້ບໍ່ໃຫ້ເກີດຂື້ນພາຍໃນ ທນບ ເດັດຂາດ, ຮັບປະກັນຄວາມປອດໄພ 100% ມອບໃຫ້ຫົວໜ້າໜ່ວຍບໍລິການເປັນເຈົ້າການຕິດຕາມ, ກວດກາປະຈໍາວັນ.
      8.  ສູ້ຊົນປະຕິບັດແຜນກໍ່ຄືຂໍ້ແຂ່ງຂັ້ນຂອງໜ່ວຍບໍລິການ ໃຫ້ບັນລຸຕາມແຜນ
      9.  ໃຫ້ບັນດາໜ່ວຍບໍລິການ, ພະນັກງານທຸກຄົນ ໃຫ້ນໍາເອົາຈຸດຄົງຄ້າງຂອງຕົນໄປປັບປຸງແກ້ໄຂ ແລະ ນໍາເອົາທິດຊີ້ນໍາຂ້າງເທິງໄປຜັນຂະຫຍາຍເຂົ້າສູ່ວຽກງານຕົວຈິງ ແລ້ພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງ.