× ທນບ ສາຂາຫົວພັນ ໄດ້ຮັບຟັງການໂອ້ລົມຂອງ ທ່ານ ແສງຈັນ ແກ້ວສ່ອງແສງ ຮອງຜູ້ອໍານວຍການ ທະນາຄານນະໂຍບາຍ
image

ພາບ-ຂ່າວໂດຍ: ຊົງລີ ຢາລື້ໄຊ

      ໃນຕອນເຊົ້າທີ 14 ມີຖຸນາ 2018 ເວລາ 8 ໂມງ 30 ນາທີ ຢູ່ທີ່ຫ້ອງປະຊຸມໃຫຍ່ ຊັ້ນ III ຫ້ອງການ ທະນາຄານ ນະໂຍບາຍ ສາຂາຫົວພັນ ໄດ້ຮັບຟັງການໂອ້ລົມຂອງ ທ່ານ ແສງຈັນ ແກ້ວສ່ອງແສງ ຮອງຜູ້ອໍານວຍການ ທະນາຄານ ນະໂຍບາຍ ເຂົ້າຮ່ວມຮັບຟັງຄັ້ງນີ້ມີ ທ່ານ ຄຳພັນ ແສນຄຳ ວ່າການຫົວໜ້າພະແນກຈັດຕັ້ງ-ພະນັກງານ ສຳນັກງານໃຫຍ່, ທ່ານ ກອງສີ ບຸນສຸວັນ ຮັກສາການ ຫົວໜ້າ ທະນາຄານ ນະໂຍບາຍ ສາຂາຫົວພັນ, ທ່ານ  ຄຳພັດ ແກ້ວວິໄລ, ທ່ານ ສົມພານ ຍວນມາ ຮອງຫົວໜ້າ ສາຂາຫົວພັນ,  ມີບັນດາຄະນະຂະແໜງການ, ຄະນະໜ່ວຍບໍລິການ ແລະ ພະນັກງານວິຊາການ  ເຂົ້າຮ່ວມທັງໝົດ 33 ທ່ານ, ຍິງ 10 ທ່ານ.
      ທ່ານ ກອງສີ ບຸນສຸວັນ ຮັກສາການຫົວໜ້າ ທະນາຄານ ນະໂຍບາຍ ສາຂາຫົວພັນ ໄດ້ລາຍງານຫຍໍ້ ສະພາບການເຄື່ອນໄຫວວຽກງານ-ການຈັດຕັ້ງປະຕິບັດໄລຍະຜ່ານມາ ໂດຍໄດ້ຍົກໃຫ້ເຫັນດ້ານດີພົ້ນເດັ່ນ, ດ້ານອ່ອນ ບາງບັນຫາຂໍ້ຄົງຄ້າງ ໂດຍສະເພາະແມ່ນດ້ານວຽກງານສິນເຊື່ອ, ການປະຕິບັດວຽກງານຢູ່ແຕ່ລະຂະແໜງການ, ແຕ່ລະໜ່ວຍບໍລິການ. 
      ທ່ານ ແສງຈັນ ແກ້ວສ່ອງແສງ ຮອງຜູ້ອໍານວຍການ ທະນາຄານ ນະໂຍບາຍ ໄດ້ມີທິດຊີ້ນຳແກ່ພະນັກງານ ໂດຍທ່ານ ໄດ້ເໜັ້ນໜັກໃຫ້ພະນັກງານທຸກຂັ້ນ ເອົາໃຈໃສ່ສຶກສາອົບຮົມວຽກງານການເມືອງແນວຄິດ ໃຫ້ກັບພະນັກງານເປັນແຕ່ລະໄລຍະ, ໃຫ້ມີຄວາມອຸ່ນອ່ຽງທຸ່ນທ່ຽງເຊື່ອໝັ່ນຕໍ່ໜ້າທີ່ວຽກງານວິຊາສະເພາະ, ມີຄວາມໂປງໃສຊື່ສັດບໍລິສຸດກັບວຽກງານຕົນຮັບຜິດຊອບ,  ແບບແຜນວິທີເຮັດວຽກ  ຕ້ອງມີການປັບປຸງເປັນແຕ່ລະໄລຍະລະອຽດສອດ
ຄ່ອງທັນກັບສະພາບ ແລະ ມີຄວາມເຂັ້ມງວດຂື້ນຕື່ມ, ພະນັກງານຕ້ອງກໍາແໜ້ນພາລະບົດບາດ, ລະບຽບແນວທາງນະໂຍບາຍຕ່າງໆ ຂອງທະນາຄານ ນະໂຍບາຍ, ມີການປຶກສາຫາລືກັນເປັນໝູ່ຄະນະ ນັບແຕ່ຫ້ອງການສາຂາຮອດໜ່ວຍບໍລິການ, ວຽກງານປ້ອງກັນໃຫ້ມີຄວາມສະຫງົບຢູ່ແຕ່ລະຂົງເຂດ, ການມອບວຽກເຊີ່ງກັນ ແລະ ກັນ ແຕ່ລະໄລຍະຕ້ອງເຮັດເປັນລາຍລັກອັກສອນຢ່າງຈະແຈ້ງ, ມີການຜັດປ່ຽນລົງການແກ້ໄຂໜີ້ ລະຫວ່າງຂະແໜງກັບໜ່ວຍ, ໜ່ວຍກັບໜ່ວຍ, ສໍາລັບລູກຄ້າລາຍບຸກຄົນຕ້ອງໄດ້ໃຊ້ມາດຕະການຂັ້ນເດັດຂາດໃນການແກ້ໄຂໜີ້ສິນ. ການປະຕິບັດໜ້າທີວຽກງານ ໃຫ້ເອົາໃຈໃສ່ໃນການສະກັດກັ້ນຕ້ານປະກົດການຫຍໍ້ທໍ້ຕ່າງໆທີ່ຈະເກີດຂື້ນ.
      ການຮັບຟັງໂອ້ລົມ ຂອງທ່ານ ຮອງຜູ້ອຳນວຍການໄດ້ປິດລົງໃນເວລາ 11 ໂມງ 00 ນາທີ ຂອງວັນດຽວກັນ