× ທນບ ສາຂາຫຼວງນ້ຳທາ ເປີດກອງປະຊຸມຮັບຮອງແຜນສິນເຊື່ອ ປະຈຳປີ 2019 ແຂວງຫຼວງນ້ຳທາ
image

ພາບ-ຂ່າວໂດຍ: ພອນສະນິດ ສຸປັນຍາ
      ຕອນເຊົ້າເວລາ 08:30  ຂອງວັນທີ  16  ມັງກອນ 2019 ທະນາຄານນະໂຍບາຍ ສາຂາຫຼວງນ້ຳທາ  ໄດ້ເປີດກອງປະຊຸມຮັບຮອງແຜນສີນເຊື່ອ ປະຈຳປີ  2019  ຮ່ວມກັບຄະນະກໍາມະການສິນເຊື່ອ  ທນບ ຂັ້ນແຂວງ  ຢູ່ທີ່ຫ້ອງປະຊຸມຊັ້ນ3  ໂດຍພາຍໃຕ້ການເປັນປະທານຂອງ   ທ່ານ ປອ ເພັງພະວັນ  ດາວພອນຈະເລີນ   ກຳມະການປະຈຳພັກແຂວງ ຮອງເຈົ້າແຂວງຫຼວງນ້ຳທາ  ເປັນກຽດເຂົ້າຮ່ວມໂດຍ  ທ່ານ ສີສຸພັນ ໂພໄຊສີ ຮອງຜູ້ອໍານວຍການ ທະນາຄານນະໂຍບາຍ ສໍານັກງານໃຫຍ່, ມີຮອງຫົວໜ້າສາຂາ ທະນາຄານນະໂຍບາຍ ຫຼວງນໍ້າທາ,  ມີບັນດາທ່ານຄະນະກໍາມະການສິນເຊື່ອຂັ້ນແຂວງ, ປະທານກໍາມະການສິນເຊື່ອຂັ້ນເມືອງ  ແລະ  ຫົວໜ້າຂະແໜງ,   ຮອງຫົວໜ້າຂະແໜງ ການທີ່ກ່ຽວຂ້ອງເຂົ້າຮ່ວມທັງໝົດ 16  ທ່ານ.
      ກອງປະຊຸມ ທ່ານ  ຮອງຫົວໜ້າສາຂາ ທນບ  ຫຼວງນ້ຳທາ ໄດ້ລາຍງານການເຄື່ອນໄຫວວຽກງານສິນເຊື່ອຂອງທະນາຄານນະໂຍບາຍ ສາຂາ ຫຼວງນໍ້າທາ ໃນໄລຍະ 1 ປີຜ່ານມາ ແລະ ທິດທາງແຜນການປີ 2019, ຫຼັງຈາກນັ້ນ  ທ່ານ ສຸກສາຄອນ ແພງພົມມີ  ຫົວໜ້າຂະແໜງສິນເຊື່ອ ກໍ່ໄດ້ຜ່ານແຜນສິນເຊື່ອປະຈໍາປີ 2019 ມີທຶນລວມທັງຫມົດຈໍານວນ 16,800,000,000 ກີບ, ໃນນັ້ນທຶນເມືອງເປົ້າຫມາຍ 14,090,000,000 ກີບ, ທຶນຈຸດສຸມ 1,000,000,000ກີບ ແລະ  ທຶນສາມສ້າງ  1,710,000,000 ກີບ,  ຈາກນັ້ນ  ກອງປະຊຸມໄດ້ຮັບຟັງການປະກອບຄຳຄິດຄຳເຫັນຂອງບັນດາຄະນະກຳມະການຄຸ້ມຄອງສິນເຊື່ອຂັ້ນແຂວງ,  ຂັ້ນເມືອງ  ແລະ  ເຫັນດີເປັນເອກະພາບຮັບຮອງເອົາແຜນສິນເຊື່ອປະຈໍາປີ 2019 ໃຫ້ແກ່ປະຊາຊົນໃນເມືອງທຸກຍາກ, ເຂດຈຸດສຸມ ແລະ ບ້ານສາມສ້າງທົ່ວແຂວງຫຼວງນໍ້າທາ. 
      ຕອນທ້າຍກອງປະຊຸມ  ທ່ານ ປະທານກອງປະຊຸມ  ຍັງໄດ້ໃຫ້ກຽດໂອ້ລົມຕໍ່ກອງປະຊຸມເຊີ່ງທ່ານໄດ້ໃຫ້ທິດຊີ້ນຳຕໍ່ກອງປະຊຸມ  ໃຫ້ເປີດກອງປະຊຸມຢູ່ຂັ້ນເມືອງ ປີລະ 2 ຄັ້ງ 6 ເດືອນຕໍ່ຄັ້ງ,  ໃຫ້ເອົາໃຈໃສ່ແກ້ໄຂໜີ້ NPL ແລະ  ດອກເບ້ຍຄ້າງ   ຊອກຫາສາເຫດແລ້ວ  ໃຫ້ປະສານສົມທົບກັພະນັກງານຂັ້ນເມືອງຊ່ວຍແກ້ໄຂ,   ເພີ່ມທະວີຂອດປະສານງານລະຫວ່າງ  ພະນັກງານທະນາຄານກັບພະນັກງານລັດຂະແໜງທີ່ກ່ຽວຂ້ອງໃຫ້ດີຂື້ນກວ່າເກົ່າ,   ໃຫ້ຄະນະຄຸ້ມຄອງສິນເຊື່ອຂັ້ນເມືອງ ຕິດຕາມກວດກາປະເມີນ ແລະ ສະຫຼຸບ  ຖ້າເຫັນບັນຫາເກີດຂື້ນຢູ່ເມືອງໃດໃຫ້ເປີດກອງປະຊຸມແກ້ໄຂຢູ່ເມືອງນັ້ນ, ກອງປະຊຸມໄດ້ດຳເນີນໄປເປັນເວລາ 01 ຕອນ ແລະ ໄດ້ປິດລົງໃນເວລາ 11:40 ໂມງຂອງວັນດຽວກັນ.