× ທນບ ສາຂາ ຈຳປາສັກ ໄດ້ຈັດພິທີ ຝຶກອົບຮົມວຽກງານກວດກາ ແລະ ສິນເຊື່ອ ປະຈຳປີ 2019
image

  ໃນລະຫວ່າງວັນທີ 28 30 ພຶດສະພາ 2019 ທີ່ຫ້ອງປະຊຸມຊັ້ນ III ທະນາຄານນະໂຍບາຍ ສາຂາ ຈໍາປາສັກ ໄດ້ມີພິທີເປີດ ຝຶກອົບຮົມວຽກງານກວດກາ ແລະ ວຽກງານສິນເຊື່ອ ປະຈຳປີ 2019 ໂດຍເປັນປະທານ ຂອງທ່ານ ສີສຸພັນ ໂພໄຊສີ ຮອງຜູ້ອຳນວຍການ ທະນາຄານນະໂຍບາຍ ຜູ້ຊີ້ນໍາວຽກງານສິນເຊື່ອ ແລະ ທ່ານ ແສງເພັດ ດວງພິລາ ຮອງຜູ້ອຳນວຍການທະນາຄານນະໂຍບາຍ ຜູ້ຊີ້ນຳວຽກງານກວດກາ ໂດຍມີຜູ້ເຂົ້າຮ່ວມຝຶກອົບຮົມ 3 ສາຂາ: ສາຂາ ຈຳປາສັກ, ສາຂາ ສະຫວັນະນເຂດ ແລະ ສາຂາ ອັດຕະປື, ຜູ້ເຂົ້າຮ່ວມມີ: ຫົວໜ້າ ສາຂາ, ຄະນະ ສາຂາ, ຫົົວໜ້າຂະແໜງ, ຄະນະຂະແໜງ, ຫົວນ້າໜ່ວຍບໍລິການ, ຄະນະໜ່ວຍບໍລິການ,  ຫົວໜ້າຫ້ອງການປະສານງານແຂວງ ສາລະວັນ, ຫົວໜ້າຫ້ອງການປະສານງານແຂວງ ແຂວງສະຫວັນນະເຂດ,  ຫົວໜ້າຫ້ອງການປະສານງານແຂວງເຊກອງ ແລະ ພະນັກງານວິຊາການກວດກາ ແລະ ສິນເຊື່ອ ເຂົ້າຮ່ວມທັງໝົດຈຳນວນ  72 ທ່ານ.

     ການເປີດຊຸດອົບຮົມ-ສຳມະນາ ວຽກງານວິຊາສະເພາະຂອງ ທະນາຄານ ນະໂຍບາຍ ໃຫ້ພະນັກງານກວດກາ-ພະນັກງານສິນເຊື່ອໃນຄັ້ງນີ້ ເພື່ອເປັນການສຶກສາອົບຮົມວຽກງານວິຊາສະເພາະໃຫ້ພະນັກງານຮັບຮູ້ເຂົ້າໃຈ ແລະ ສາມາດນຳໄປຈັດຕັ້ງປະຕິບັດຕົວຈິງໂດຍສະເພາະການແກ້ໄຂບັນຫາວຽກງານກວດກາ ແລະ ການແກ້ໄຂບັນຫາວຽກງານສິນເຊື່ອ, ນອກຈາກນັ້ນຍັງໄດ້ຮັບຮູ້ເຖິງການເຄື່ອນ ໄຫວຕາມພາລະບົດບາດຂອງ ທະນາຄານ ນະໂຍບາຍ ໃນການປະຕິບັດປະກອບສ່ວນແກ້ໄຂຄວາມທຸກຍາກໃຫ້ແກ່ປະຊາຊົນບັນດາເຜົ່າ ຕາມການມອບໝາຍຂອງພັກ-ລັດຖະບານ.

    ການຝຶກອົບຮົມໃນຄັ້ງນີ້ໄດ້ປະຕິບັດຕາມຫຼັກສູດຝຶກອົບຮົມ ວຽກງານກວດກາ ແລະ ວຽກງານສິນເຊື່ອ ປະຈໍາປີ 2019 ຂອງ ທະນາຄານ ນະໂຍບາຍ ເອກະສານ ທີ່ນຳມາບັນຍາຍໃນຄັ້ງນີ້ ມີເອກະສານສະກັດກັ້ນ ແລະ ຕ້ານການສໍ້ລາດບັງຫຼວງ 1 ບົດ, ເອກະສານວຽກງານກວດກາ ມີ 4 ບົດ, ເອກະສານວຽກງານສິນເຊື່ອມີ 2 ບົດ, ລວມທັງໝົດ 7 ບົດ.  

     ເພື່ອຍົກລະດັບຄວາມຮູ້, ຄວາມສາມາດທາງດ້ານວຽກງານວິຊາສະເພາະ ໃຫ້ແກ່ນັກສຳມະນາກອນເປັນຕົ້ນ: ວຽກງານກວດກາ ແລະ ວຽກງານສິນເຊື່ອ ເພື່ອເຮັດໃຫ້ນັກສໍາມະນາກອນນໍາເອົາບົດຮຽນ, ປະສົບການທີ່ໄດ້ຮຽນໃນຄັ້ງນີ້ໄປໝູນໃຊ້ເຂົ້າໃນວຽກງານຕົວຈິງຢູ່ໃນຂະແໜງການ, ໜ່ວຍບໍລິການ ແລະ ຫ້ອງການປະສານຂອງຕົນ ໃຫ້ໄດ້ປະສິດທິພາບ ແລະ ປະສິດທິຜົນສູງ.

     ພ້ອມດຽວກັນ ຄວາມເປັນເຈົ້າການເອົາໃຈໃສ່ຂອງຜູ້ບັນຍາຍ ແລະ ນັກສໍາມະນາກອນໃນການຄົ້ນຄ້ວາ, ສົນທະນາ ແລະ ແລກປ່ຽນບົດຮຽນໃນວຽກງານຕົວຈິງທີ່ຕົນເອງຮັບຜິດຊອບ, ເຊິ່ງສະແດງອອກໃນການຕັ້ງຄຳຖາມ ແລະ ຕອບຄຳຖາມຢ່າງເປັນຂະບວນການຟົດຟື້ນ. ທ່ານ ສີສຸພັນ ໂພໄຊສີ  ຮອງຜູ້ອຳນວຍການ ຜູ້ຊີ້ນໍາວຽກງານສິນເຊື່ອ ແລະ ທ່ານ ແສງເພັດ ດວງພິລາ ຮອງຜູ້ອຳນວຍການ ຜູ້ຊີ້ນຳວຽກງານກວດກາ ເປັນຜູ້ມອບ ແລະ ປະທານໄດ້ໂອ້ລົມຊຸດຝຶກອົບຮົມ ແລະ ກ່າວປິດ ຢ່າງເປັນທາງການ.